Дэлхийн Гаалийн байгууллагаас (ДГБ) Шуудангийн сувгийн синтетик гаралтай мансууруулах бодис илрүүлэх төслийн (Synthetic Drugs Detection Project on Mail Channel) суурь үнэлгээний ажлыг АНУ-ын төрийн департаментын санхүүжилтээр хэрэгжүүлж буй билээ. Уг төслийн хүрээнд Монгол Улсад ажиллаж буй ДГБ-ын Мансууруулах болон угтвар бодисын хөтөлбөрийн техникийн атташе Астрид Хайтер, ДГБ-ын итгэмжлэгдсэн эксперт Э.Энхтуул нар 2024 оны 8 сарын 06-07-ны өдрүүдэд Монгол Шуудан ХК, Улс хоорондын Шуудан Илгээмжийн Гаалийн Газар (УХШИГГ) дээр ирж ажиллалаа.

Монгол Шуудан ХК, Монгол улсын Гаалийн Ерөнхий Газар, Улс хоорондын Шуудан Илгээмжийн Гаалийн газар, ДГБ-ын албан хаагчид хамтдаа сууж дэлхийн гааль, Монголын шуудан, Шуудангийн гаалийн байгууллагын танилцуулгыг сонсож

– Шуудангийн сүлжээгээр орж ирж буй мансууруулах бодисын урсгалыг таслан зогсоох,

– Шуудангийн бус замаар орж ирж буй интернет худалдааны барааг хэрхэн хяналтанд хамруулах,

– Гаалийн хяналт шалгалтын өнөөгийн процедур, хяналтын тоног төхөөрөмжийн хэрэгцээ шаардлага, хүчин чадлын талаар нээлттэй ярилцлаа.

 

Мөн энэ үеэр Монгол Шуудан ХК-ийн шинээр байгуулсан Улс хоорондын шуудангийн ялган боловсруулах төвд зочилж үйл ажиллагаатай танилцан санал сэтгэгдлээ солилцов.

ДГБ-ын төлөөлөгчид Монгол Шуудан ХК болон Гаалийн байгууллага төсөлд хамрагдсаны дагуу идэвхитэй хамтран ажиллаж байгааг үнэлээд цаашид улам бүр дэмжиж хамтран ажиллахаа илэрхийлсэн юм.