100 жилийн өмнө Монгол улсын тусгаар тогтнолын бэлгэдэл болсон шуудангийн анхны “Элдэв-Очир” сэдэвт долоон нэрийн марк анх хэвлэгдэн гарсан байдаг.
Монгол улс шуудангийн марктай болсон 100 жилийн ойн хүрээнд Монгол Шуудан ХК, Марк үнэт цаасны хэлтэс хэд хэдэн томоохон ажлуудыг хийж гүйцэтгэснээс дурдахад Монгол улсын анхны марк Элдэв-Очирыг 2024 оны 5 сарын 8 ны өдөр Ази-Номхон далайн бүсийн хорооны 10 дугаар Ерөнхий чуулганаар хуралдан, ЮНЕСКО-ийн өвийн жагсаалтад бүртгэгдсэн, дэлхийн анхны шуудангийн марк болгосон байна.
Тэгвэл өнөөдөр /2024.12.02/ “Монгол Марк 100 жил” сэдэвт марк нээлтээ хийлээ. Тус маркийг зураач Г.Баттөр зурж, Монголын эзэнт гүрний үеийн олон зууны түүхтэй өртөө замаас орчин цагийн шуудан, харилцаа холбоог бүхэлд нь харуулахыг зорьсон ажээ. Маркийн нээлт “Чингис Хаан” музейн хүндэтгэлийн танхимд болсон бөгөөд нээлтийн ёслолд Харилцаа Холбооны Зохицуулах хорооны дарга Г.Чинзориг, Марк үнэт цаасны хэлтсийн дарга асан МУСГЗ Раднаабазар, Монгол Шуудан ХК ТУЗ-ийн гишүүн Б.Ганбаатар, Монгол Шуудан ХК Гүйцэтгэх захирал Г.Тэлмэн, дэд захирал Н.Хосбаяр, Марк үнэт цаасны хэлтсийн дарга Б.Дамдинбазар, Монголын анхны марк Элдэв-Очирыг санаачлагч Мандалын Бат-Очирын зээ хөвгүүд Б.Очбадрах, Н.Батсуурь болон Монгол Шуудан ХК, Марк үнэт цаасны хэлтэсийн үе үеийн ахмад ажилтнууд, марк сонирхогчид оролцлоо.
“Монгол Марк 100 жил” сэдэвт маркийн чимэглэл хэсэгт анхны марк Элдэв-Очирыг санаачлагч Мандалын Бат-Очирын /1895-1938/ хөрөг, хурдан мориор довтолгон явуул “Нис, нис” гэх бичигтэй алдарт захидлын дугтуй, Монголын анхны шуудангийн салбаруудын ховор дардас, тамгатай 1 центийн марк, 100 жилийн ойн логог тус тус дүрслэн харуулсан байна.
Түүхэн дурсгалт үнэт зүйл болох Монгол маркийн хөгжилд үнэтэй хувь нэмэр оруулсан үе үеийн ажилтан, уран бүтээлчид болон марк үнэт цаас цуглуулагч та бүхэндээ Монгол маркийн 100 жилийн мэндийг дэвшүүлье.Монгол Шуудан ХК